18 март көнө беҙҙең лицейҙа Сибай Ҡоролтайы рәйесе И.Н. Бикмәтов ҡатнашлығында 9- сы класс уҡыусылары өсөн асыҡ дәрес үтте. Был дәрес Ҡрым республикаһы һәм Севастополь ҡалаһы Рәсәй дәүләтенә ҡушылыуға бағышланды.

Йәмғиәтте өйрәнеү  фәне уҡытыусыһы Г.М. Тимербулатова Ҡрым тарихына байҡау яһаны. Заманында Ҡрымға Рәсәй дәүләте күп сығым түккән. Сөнки флотты, иҡтисадты үҫтереү, Ҡрым аша башҡа илдәр менән мөнәсәбәттәрҙе  яйлау – тәү маҡсат булып торған.

Был дәрестә И. Әхмәтзадин, И. Сөләймәнов үҙҙәренең тарих буйынса төплө белемдәрен күрһәтә алдылар. Ирек Ниғәмәт улы Бикмәтов үҙенең сығышында башҡорт халҡының төрлө яуҙарҙа Ҡрымға ҡаршы һуғышта ҡатнашыуҙарын телгә алып үтте. Дәрестең сағыу слайдар менән оҙатылып барыуы, балалар менән саҡырылған ҡунаҡ араһындағы йылы һөйләшеүҙәр уҡыусыларҙың хәтерендә оҙаҡҡа ҡалыр һәм улар бик күп файҙалы мәғлүмәт алғандарҙыр, тип ышанғы килә.